Тәуелсіздік – ұлттың ұлы мұраты. Бұл тек саяси дербестік емес, рухани жаңғырудың бастауы, ұлттың өзін-өзі тануы мен болашағын айқындауы. Қазақ халқы үшін тәуелсіздік – сан ғасырлық күрестің жемісі, ұлттық рухтың қайта түлеуінің символы. Қазақ тарихы еркіндік үшін күреске толы. Әз-Тәуке ханның «Жеті Жарғысы», Абылайдың бірлік пен азаттық жолындағы саясаты, Кенесарының отаршылдыққа қарсы көтерілісі – бәрі де ұлттың рухын сақтау үшін жасалған қадамдар еді. Кеңес дәуірінде қазақ халқы ұлт ретінде жоғалудың аз-ақ алдында тұрды. Тілі шектеліп, діні тұншықтырылып, тарихы ұмыт бола жаздады. Алайда халықтың рухы ешқашан өшкен жоқ. Желтоқсан көтерілісі осы рухтың қайта жаңғырғанын көрсетті. 1991 жылы тәуелсіздік туы желбіреп, қазақ халқы өз тағдырының қожайынына айналды.
Ұлттық рухтың түлеуі үш негізгі тірекке бөлініп қарастырылады:
- Тіл
Тәуелсіздікпен бірге ана тілімізге еркіндік келді. Қазақ тілі мемлекеттік тіл мәртебесіне ие болып, оны дамытуға жаңа мүмкіндіктер ашылды. Тіл арқылы ұлттың мәдениеті мен болмысы сақталады. Алайда бүгінгі таңда қазақ тілінің толыққанды қолданысқа енуі – біздің алдымыздағы ең үлкен міндет.
- Дін
Дін – ұлттың рухани тірегі. Кеңес дәуіріндегі қысымнан кейін тәуелсіздік дінге еркіндік әкелді. Халық мешіттерге қайта оралып, азан үні жаңғырды. Ислам діні қазақ халқының рухани құндылықтарының негізі ретінде қайта орнықты. Рухани жаңғыру арқылы қоғамда бейбітшілік пен ынтымақ орнай түсті.
- Мәдениет пен тарих
Тәуелсіздік жылдары ұмыт болған тарихи тұлғаларымыз бен оқиғаларымыз қайта жаңғырды. Қазақ хандарының есімдері ұлықталып, Алаш қайраткерлерінің еңбектері халқымен қауышты. Этнографиялық мұралар, ұлттық өнер мен әдебиет қайта дамып, жаңа белестерге көтерілді.
Тәуелсіздік – ұлттық рухтың тірілуі, жаңа биіктерге ұмтылу дәуірі. Тіл мен дін, мәдениет пен тарих – бәрі де тәуелсіздіктің арқасында қайта жаңғырды. Бұл құндылықтарды сақтау – әрбір қазақтың қасиетті парызы. Ұрпақтарымыздың бойында ұлттық рух пен тәуелсіздікке деген мақтаныш сезімін қалыптастыра отырып, болашаққа нық қадам басуымыз керек.
Орал медресе колледжінің арнайы пән оқытушысы: Б.С. Бектияров
